電影台語 GNN紹介
致命救援~ gone

導演:Heito Dhalia
演員:Amanda Seyfried / Jill

這是一個 女英雄自救e故事。

一冬前 Jill 半暝 ho歹徒綁架, di深下e地洞 度過 驚心動魂e時刻, 真濟女性遇害, Jill是 唯一逃生e一個。
歹徒 感覺 輸一個弱女子, 一項 無結束e代誌 掛心頭, 唱聲veh來拚。
Jill 心頭掛著 恐佈e驚惶, 一項威脅 日夜纏due 著伊, 伊無放棄 巡cue 原來e 受害地點, 時時為著 惡魔來侵襲 ehit刻 為反擊做準備。
Jill 去向警察局 報案, 警察 認定伊是 精神分裂, 安排伊 去住院, 伊e懼怕 心理表白 攏ho zit群警察 當作幻覺, 甚至 驚伊zah槍自衛veh掠伊。
有一暗, Jill 暗時去做kangkue 轉來 發覺小妹仔 已經受害, 走去報警, 回受著 涼水kau面e滋味。
Jille目屎 黏di 伊無合眼e目睭, 緊張驚心萬分, 姑不二終 家己一人 一項一層e 線索, 親自探察, 伊e神態 流露著 小妹會受害e 生死關頭e 焦慮, 伊爭取時間, 每一關卡 gah人zi-ziap 攏為著 解救e 上大效果 來設想, 伊一頭緊張gah 起顫 一頭冷靜 編故事 來得著情報, 時間緊逼 救人卡重要, 隨時 保持著警覺 gah di千鈞一目nih仔間 下判斷e時機。
步步驚魂 步步對決, Jill e 聰明 勇敢 臨場應對e節奏 詮釋著 推理破案e節奏, 半夜入林 gah歹徒設好e陷阱 對抗, 氣氛掌握了真好。
就電影安排 謎題解破emeh角 來看, zit片勝過 〈龍紋身e女孩〉, 因為龍片想veh ga厚度真大e 故事情節 濃縮di短短幾點內, 所以 往往 看過冊e人 攏有感覺 掠影過頭簡略, 所以影幕 只好拾選, 咱閣看Holmes系列e電影, 必須愛due著 60個故事e綜合了解 ziah可明白 電影e企圖, 所以有當時 演Holmes 不免 ga主角演過頭, 變做有 大神通力e高探, 真實度無夠。 但di zit片來看, 外景gah心理 配合了 有達到 siap-pah 兼dau-dahe 境界, 線索推理 步步埋了 漸進分明。
Holmes 看起來是 造神奇 離一般真實e世界 卡遠, “Gone” zit片 貼di咱普通e生活, 叫人 du著 傷害e處境, mtang放棄希望, 當然 強者是自動e m是 被動受害, 受害者 已經有夠可憐a, 奈何警察 無認真破案 為民除害, suah閣加害 人e二度傷痕。
Jill 講:“惡徒若死 我卡肯去睏”, 焦慮藥仔 也可m免食a, 愈食愈可怕, 本底無病e ho人sak去做病患 zit個世界 分ve清楚dor一爿是痟人, 真人講真話 ho人 充做痟話, zit個 五濁惡世 m知是啥人 deh起痟 莫怪Jill 心驚眼跳。
尾節 警察來到 Jille厝 犯案現場 之一 真嚴肅 veh調查惡徒 e時, Jill真理性ga警察講: 「攏是幻覺」, 分明m愛 gah zit群人 sng, 話中 充滿諷刺gah無趣味gah zit群庸才e 治安執事者 講話, 看破歸氣 自按呢結束 卡省事 因為真正e威脅 已經了斷 放放ho去 過正常e生活 卡是幸福 , 這應該是 “GONE”e重點。
Zit個心理戲, 推測戲, 女主角 繪聲繪影, ui“Mamma Mia!”青春無限e 少女, 笑口常開e 歡樂 轉換角色 來演出zit片 入險境e 現代推理電影, 可看著 伊e戲路 真闊, 前途無限。
這可算是 今年度 好電影之一, 觀眾 可品賞 伊e意涵!

nanomi 發表在 痞客邦 PIXNET 留言(0) 人氣()