高雄庄頭藝穗節 看庄頭戲
台語戲劇專欄 GNN紹介

連續二冬 由高雄市政府文化局主辦e 高雄庄頭戲, 2012年9月初9暗時 di大社國中 欣賞一齣 台語歌仔戲-- 劉瑞蓮護國, 內容是deh講後漢時代e劉智遠皇帝, 生性風流 是非無分, 內政無什麼出色, 外交ma無威風, 佳哉 有東宮皇后 劉瑞蓮 武藝一流 閣有帶兵經驗, 以伊e智勇雙全 解決內憂外患e威脅。
久來 無看過歌仔戲, zit回臨時起意 撥工去觀賞 春美歌劇團戲e 招牌演出。 Ho人 大開眼界 是 戲裝、 戲台e氣勢 攏已經m是 三四十冬前e格局。 難得e是 臨時舞台搭gah真大。 可是台頂e演員 每一個人e表情 攏以真人 實比例 表現出 真生動e情緒語言, 生氣、 歡喜、 膽寒、 陰奸、 戲鬧、 sai-nai[撒嬌]、 悲傷、 得意、 私下恥笑 等等 攏有針對 身份、 心情變化 做出真好e詮釋, 這m是 電影、 電視頂面e特寫鏡頭 用特別e技術 剪接修飾過e放大, 卻可看著一清二楚e表情, 可講是燈光、 演員、 布局e優點。
唱、 演、 念、 打 di zit齣戲真幼工, 一開場武戲e部份diorh演了真濟, 其中閣有一寡武藝幼步, 真明顯di劉瑞蓮e腳手功夫喬段 表達了 真siap-pah兼dau-dah [入裡深透], 觀眾一路拍pok仔 咻叫; 西妃蘇秀英 裝飾嬌滴滴 施展女性 歸工迷皇帝e魂體; 皇帝劉智遠e個性 一下仔驚忠直決斷e東宮、 一下仔疼命命 西妃妖美女, 個性變化兩極 加上戲齣內底e笑料, 真是演出一流, 莫怪場中 身邊有一位無熟識e粉絲 對我講, 伊看團長郭春美 (此部飾皇帝)e戲 已經看二十冬, 反串男小生攏無老, 而且真轟動, 頂港有名聲、 下港上出名, 金牌賞足濟, 可見zit款野台戲氣味 閣有現代劇院貴氣e戲齣 並無因為歌仔戲e勢弱 來失去生機, 原底歌仔戲e歌曲形式, 比如 七字接搖板、 緊疊仔、都馬調 等 攏透過戲齣e進度, ga戲齣e精華重點 表演出來, 舊架構加上新元素, 莫怪 南北粉絲 due演出 pa-pa走, di西門町 現代流行e街路舞之外, 另一種後現代e表演文化形式 di zit場演藝上 表現出來, 這可看著 成功總是來到有準備e人身上 之說明。
觀眾並無因為是歌仔戲 全dorh 老阿公老阿婆e死板印象, 真濟人看起來是少年人, 來看戲 親像參加一場嘉年華會, 台頂台腳攏真親和, 甚至有人穿sui-sui 從來無缺席過 任何zit款本土歌劇e場合, 坐位外四箍圍 閣有kia deh看e觀眾, 場外 有真濟 小點心擔 gah 一寡藝量品攤位。
這是一齣罕見e女英雄戲, 真濟對話 攏是用台語e文言音, 有寡雄雄聽無, 歌曲詞攏有di舞台雙爿邊仔小銀幕 拍出, 只是若veh有卡好e效果, 上好是台詞 ma拍di銀幕頂面, 而且 口語對談 可卡現代leh, 按呢卡好達到 庶民生活e 淺易交流。
文化是軟實力, 期待 台灣存在真濟 蠓仔院館e同時, 加想一寡 像按呢全民活動e策畫, 激勵參與 可影響著 人民e積極意識, zit項 抽象e動力 是會轉化做 社會能量。
一向個人無真注意e南韓, 科技、 戲劇、 食品、 穿插等, 攏已經進一大步,ma進入已開發國家, 近來又 將早di15 世紀中葉年間 已建造諺文系統e世宗大王, 追崇伊對國族文化貢獻, 特別設立 世宗市鎮, 以敬記一代賢士e遠見, 這對文經消弱中e台灣 是一個真大e指標作用。
若是戲碼 閣卡注重 本土英雄事蹟, 庄頭戲 必有 觀眾自身e熟識身影, 按呢e根 對國民e信心 必然內化di生活中。

nanomi 發表在 痞客邦 PIXNET 留言(0) 人氣()