nanomi

電影台語 GNN報導
如何消滅戰爭～～超異能部隊 / the man who stare at goats

導演：Grant Hesloy
演員：Bob Wilton / Ewan McGregor、 Lyn Cassady / George Clooney、
Larry Hooper/ Kevin Spacey、Bill Django / Jeff Bridges

美蘇 冷戰期間， 法國人講 美國 有一隊部隊 是 訓練 超異能ｅ方法 veh去 消滅戰爭， 蘇聯方面 聽了diorh去組zit款類似ｅ部隊， 美國人 知影對手 有ziah厲害ｅ武器， ma 輸人m輸陣 去組 一隊 怪異ｅ軍隊。
對立 比看啥人 拳頭母卡大 是一種 恐怖平衡， 自來 美蘇兩國 是 小說、 電影ｅ 題材， 何況 zit款類似ｅ組織 di 二、 三十冬前 確實存在過。
小說家 ga 納入題材， 可見 美國國民 面對 國家機器 所運作ｅ 軍事決策， 有意見， 比如 韓戰、 越戰 之後， 911了後 前後閣 出兵去 伊拉克、 阿富汗， zit款代誌 又閣如何？ 宣戰 是 一種姿態， 人民ｅ生命 又閣如何？ Obama du得著Nobel 和平獎， 一面閣 deh 增派 兵士 出動去 阿富汗， 叫人民 按怎想。
一個人 一世人 若是 逐工睏醒 攏是帶著 想veh 消滅敵人、 目睭一tih開看著 一隻腹肚透紅ｅ 蠓仔， 本能ｅ 伸手diorh veh拍死 hit隻昨暗 ga你ｅ身軀ｅ血 吸gah 飽飽ｅ、 可惡ｅ 蠓仔， 歸個頭殼 攏deh想 如何 征服別人、 pah敗別人， diorh是無恨 ma veh製造 恨ｅ心態， 按呢 到尾後 人diorh會驚， 驚ｅ原由 是 因為 你去 猜疾算計 凌遲別人， 久了後， 到你ｅ體力、 勢力消退去a， 開始 驚別人 來報復， 所以 di戰場 沐過血ｅ人， 一世人 攏ho 家己親手 tai死ｅ情景 掠diaudiau， 心中驚魂ve定， 到尾a 起痟ｅ人 真濟leh！
是m是mai 開槍 diorh可趕走敵人， 親像 一場催眠， m免 勞師動眾， 只要用 “看功”來化解、 來消滅 對方？ 所以 veh 組一支 超異能部隊 用目神金金相 (gaze)， diorh可ga對方 qin gah 倒落去， 所以yin 去做 實驗gah 訓練。
本來 防衛 用武器 是 常態， zit種 用超能力ｅ 另類戰術， 想veh 領先ｅ 構想， 一開始 一個將軍 diorh想veh用心術 穿過壁， 結果是 踢著鐵板 人倒落去， 到尾後 扮演記者ｅBob 親像 魔術穿壁 成功變通， 按呢 做一個 隱身術ｅ 特技鏡頭 ho你看， 親像 Harry Potter yin一陣人 veh去 魔法學校， 需要穿過 九又四分之三月臺， ho你感覺 人真正會 飛天鑽地。
一個自由ｅ國家， 可容允 ho大眾 用各種角度 去想、 去諷刺、 去掀開 納稅人ｅ 血汗錢 如何去 巧立名目 來消化預算， di zia 先mai 講 siunn濟， diorh ho Bob帶你去看 一個人 如何 對著一隻羊仔 金金相ｅ意外， 連後看著 一寡 表面講gah真sui氣， 幕後攏是 製造ｅ 離經謬誤 。
改自 仝名小說 由 Jon Ronson 寫就， 中文版 由天下出版社 譯出。