nanomi

電影台語專欄 GNN紹介
一切攏是 為著愛 ～～ 天外奇蹟ｅ Up

導演：Pete Docter、 Bob Peterson
演員：Carl、 Ellie、 Russell、 Kavin、 Talking Dog

Carl di qin-a時代 diorh熟識 Ellie， 後來 結做夫妻。 Ellie 有一本 探險簿仔， 內底 有一寡 日記、 夢想gah插畫。 其中 上大ｅ目標 diorh是 veh 去南美洲 看 仙境水沖。
Carl 是一個 di動物園 賣 造形氣球ｅ 小角色， 生活以外， 所儉ｅ錢 攏無法度 去實現 yinｅ美夢。 Mgorh 翁仔某 過gah 甜甘蜜甘。
有一工， Ellie離開伊 先行一步 lo。 78歲 孤單ｅ Carl， 日日夜夜 攏 di yin兩人 起造ｅ 世間厝 回憶過去ｅ 點滴。
細間厝 是 yin-ｅ 安慰gah 記憶。 外圍ｅ環境 攏已經 起造大樓， 細間厝 親像 kiadi 山谷中ｅ 一粒細細ｅ 石頭。 營造公司 一直veh ga Carl 買起來， 免得 過時ｅ 透天厝， dihia 礙事。 Carl死守著 一間厝， 因為 細間厝 對伊 有特別ｅ 意義， 起厝公司 不過是 財團利益。
有一工 代誌發生 a。 起厝ｅ工人 破害著 伊gah Ellie 合作ｅ 信箱， Carl 真生氣 teh物件 摃工人， 工人受傷， 起厝公司 ga Carl 告訴。 Carl 是被動ｅ 受害者， 卻愛 hong裁判 去住 養老院。
Carl m愛服從 關去 養老院， diorh di 細間厝 縛一大堆ｅ 氣球， 歸間厝 飛去天頂， 開始veh去 找仙境水沖。 原野社團ｅ 小學生 Russell 早著vih di 細間厝ｅ 走廊外口， 跟隨著 Carl 求老人 ho伊做伙 逗陣行。
一老一幼 開始 空中飛行， 到 一個所在 無法度飛， 老人只好 qiu著 縛厝基座ｅ 索仔， 一步一步 艱難行。 Russell 是 一位 due 鼻蟲， 生做一個 hang乳膨皮面。 身軀 揹一大堆 勳章、 小鼓吹、 lok-gor-sok-gor 物件 對比著 老人 雙手qiu di 頭殼頂ｅ 飛行厝 閣有一支 無離手ｅ 柺仔。
Yin途中du著 傳說中 一隻彩色ｅ 大鳥、 會講話ｅ 狗仔。 仙境水沖 已經di目前， 後來 陷入 Charles Muntz ｅ地盤， Charles 一心一意 veh找 傳說中ｅ 大鳥， 飼一堆 聽話ｅ狗 起歹心 貪取大鳥， 不管 別人ｅ死活。 一個四人隊 開始對抗， 得著勝利。
空中飛行 du著雷雨 閣有相戰ｅ 驚險鏡頭， 用 3D立體ｅ 影像效果vevai。
電影中 veh 表達ｅ 是 老人對 牽手ｅ深愛、 對qin-a、 鳥仔ｅ 仁慈。 Russellｅ角色 真趣味 尤其是 伊ｅ情緒 足平bang， 神經 真大條， du著困難 真勇敢， 起初 對Carl來講 是 負擔， veh棄嫌伊 伊diorh是 veh做 due鼻蟲， 理由 是 愛完成 幫助老人ｅ 經歷。
氣球 qiu起 細間厝， 老公仔 拖氣球厝、 小學生 due後壁， 親像一個 公孫仔ｅ 畫面。
老公仔 後來 有一本 家己ｅ 探險簿仔， 伊ｅ穿插 gah Russell 真仝款， 活跳跳 笑頭笑面 親像 一隻 飛龍在天。
愛牽手、 愛眾生、 愛家己， 趕緊去 實現 咱ｅ美夢 吧！