• May 06 Sun 2012
• 無仝款e餐宴~記 許極燉家族回台宴會 巧遇 李鴻禧教授 台灣有人才 GNN紹介
台灣有人才 GNN紹介
無仝款e餐宴~記 許極燉家族回台宴會 巧遇 李鴻禧教授

僑居日本e 許極燉教授, 熱愛台灣, 對台灣歷史、 語言、 文學等文化層面投入一生, 阮zit群人 推崇伊 是 領航大元帥。
許教授 特別選擇 今年春夏之交 日本黃金假期一禮拜 回台灣。
伊帶領家屬十個人 gah伊e大漢後生e丈人丈姆 辦桌請客 紹介ho故鄉e親友熟識, 以完成 人情世事e一頁, 用心體貼, 紳士家庭, 以身教家教 ho旅居海外e宗族 感受著 家族根頭e發源地, 展現著 大元帥e真情 台灣心 台灣情。
席中 有夫人 炳玉女士 手藝所做e 精緻牙簽, 以日本女性傳統和服 用心製作, ho人感受著 美麗大方 溫文雅氣e 女性內涵, 每一個e座位桌前 攏有一個摺紙色鶴 表達和平觀愛, 來感謝 台灣對2011日本311大地動e眷顧。 Zit款透過答謝禮儀, 民間家庭 透過zit個宴會方式 代表國gah國之間e感情 這顯示著 zit傢伙e素養好、 表示 台灣人家庭 到dor位 攏自然流露e真誠, 親像 台灣人di世界 得著 真濟e發明獎, 攏有 真實在e本事。 台灣人本底diorh具有按呢e才能, 為什麼對家己hiah無信心, 親像台語台文e書寫, 逐家攏有受過基礎 已經具備 真好e學識, 常用漢字 已經具足, 加上 一套簡易通達e羅馬拼音, 以 漢羅並用e 台文方式書寫, 只差di心態跨ve過, zit個突破點 差di點破gah決心。
阮真歡喜gah許教授一家人ho阮分享yine歡樂, 同時ma期待 台灣人 做伙了解 咱有e優點 將咱e實力展現出來。
席中 安排 李鴻禧教授gah阮 仝桌坐做伙, 另有 陳茂雄教授、 余伯泉教授、前衛林文欽、 秀鳳、 富美。
李教授 上台致辭 了後, 隨心gah逐個開講。 伊出世真艱苦, di語言方面, 先是 老母教台語、 再用日語、 再用華語 閣來用abc, 因為 讀憲法e關係, 閣讀法語、 德語 ma vat一寡拉丁語, 比較了後,伊歸納著 台語上sui。
李教授gah阮 di2003年 做伙一批 前後受 主持 日本台灣語言文化協會e 許教授邀請 去講座, hit當時 雖然無同齊現身, mgorh gah zit位di電台gah過去聽過e名嘴 仝一級出席, 感覺真光榮。 到zit個宴會, ga阮箍做伙, 對李教授確實有親聆e機會。
阮兜e冊櫥, 床頭椅仔攏是冊deh住, 按呢近萬本, 但是李教授 家中e藏冊有過一二萬本, zitma捐ho台大近半, 除了 專業套冊, 讀冊雜菜麵 ma 真愛logic, 法律以外, 喜愛 希臘幾何家 音樂 藝術精通, 閣是旅遊達人,旅歷過 一百個國家以上, 近期veh閣去復活島, 旅遊見識 深達 景點e文化歷史旅e背後意義, ho阮有寫過《三姊妹看世界》e經驗 聽gah真入心入骨。
七十外歲e人, 頭殼清楚 記憶力強, 講什麼 知影什麼, 才華洋溢, 閣會曉聽 聽有別人deh講啥、 反應閣緊, 尤其是 伊對辨識 語言聲音 真厲害, 聽過diorh記e, 到三四十歲 聽過外語diorh會記得, 看起來 天賦本事gah後天轉注修煉攏真特異。 七十外歲e長老, 智慧圓熟 ho人 感應著 近代啟蒙大師 日本e福澤諭吉e氣度、 接想著 德國教育家 Wilhelm von Humboldt [洪堡1767-1835]e眼界、 匈牙利 政治家 Szechenyi [塞錢尼1791-1860] e 開基國民主科學e魄力, 匯 自由主義、 政治思想、 語言哲學、 教育理想, 集 古典優雅 學通古今, 散發出人性e 真善美, di李教授 許教授身上, 咱可看著 台灣精英e風範, yin 兩人熟識四十五冬, 台灣有人才 親像按呢 閣真濟, 只是 攏潛di人群當中 實實在在deh以身力行, 一如zit塊土地上e 耕作做田人, 一代一代恬恬 付出生命力, 一寡人 有家己e成就 是 聰明力, 另有一寡過超e人, 真正e生活力 ho生命運行e機制, 從來無爭去 台前膨風 坐大位做大官, 只有恬恬 建基立石, 行使保護著 善良眾生, 這是 菩薩力。
李教授 是 行動家 思想家 理想家, 有Canon Doyle[柯南道爾1859-1930]筆下eHolmes身影 可講是 台灣e 第一才子, di電視專題節目中 伊批評時事 天m驚 地m驚, 伊e頭殼頂 只有一個人 ~ 牽手。
席中 zit頓飯 食起來 攏卡無感覺著 特別美食e 舌覺, 原來是 阮e注意力 攏ho吸過去, 聽話會飽足, 而且 阮兜無電視通看 李教授e節目, 所以 親聞本尊 談話 真興味。
現代當下 真少有 按呢e人物, 是m是 ganna看經濟面向 去股票市場 趁錢 變做時尚, 有錢 diorh大刺刺 講gah嘴角全波, 電視節目 偏向 KUSO式e消遣, 親像zit輩精英 按呢e 時代良心, 為何 無閣發生?
這是一攤 家庭賀喜e饗宴, ma是 台灣人 真實e勇氣e聚會, 咱無理由鬱卒 來消磨咱e意志!

(GNN 20120505)
nanomi 發表在 痞客邦 PIXNET http:// blog.pixnet.net/nanomi
• 個人分類:台灣有人才
創作者介紹

nanomi

nanomi 發表在 痞客邦 PIXNET 留言(0) 人氣()